Машварати кории Эмомалӣ Раҳмон бо роҳбарону фаъолони вилояти Суғд

Обуна шудан
Эмомалӣ Раҳмон дар қароргоҳи Ҳукумати Ҷумҳурии Тоҷикистон, воқеъ дар шаҳри Гулистон бо роҳбарону фаъолони вилояти Суғд машварати корӣ доир намуд

ДУШАНБЕ, 19 ноя — Sputnik. Ба гузориши хадамоти матбуотии раисҷумҳур, дар кори машварат вазъи иқтисодию иҷтимоии вилояти Суғд, рафти корҳои ободонию созандагӣ, кишту кор, ташкили корхонаҳои нави саноатӣ ва таъсиси ҷойҳои корӣ, бартараф кардани камбудию мушкилоти ҷойдошта давоми даҳ моҳи соли 2017 мавриди таҳлилу баррасӣ қарор дода шудааст.

Эмомалӣ Раҳмон дар мулоқот таъкид кардааст, ки тибқи таҳлилҳо дар нуҳ моҳи соли 2017 маҷмӯи маҳсулоти истеҳсолии вилоят нисбат ба ҳамин давраи соли гузашта 6,9 фоиз, аз ҷумла саноат 33 фоиз афзоиш ёфта, мутаносибан ба 11,7 ва 7 миллиард сомонӣ баробар шудааст.

"Тайи даҳ соли охир дар доираи лоиҳаҳои сармоягузорӣ ба иқтисодиёти вилоят зиёда аз 7,5 миллиард сомонӣ сармояи хориҷӣ ҷалб шудааст. Ҳоло дар соҳаҳои нақлиёт, энергетика, кишоварзӣ, беҳдошти замину обтаъминкунӣ ва дигар соҳаҳои вилоят татбиқи 23 лоиҳа идома дошта, то имрӯз қариб 2,5 миллиард сомонӣ аз худ карда шудааст. Дар доираи татбиқи Барномаи миёнамуҳлати рушди иҷтимоиву иқтисодии вилояти Суғд барои солҳои 2016-2020-ум бошад, 188 лоиҳа ба маблағи беш аз 11 миллиард сомонӣ ба нақша гирифта шудааст", — гуфтааст раисҷумҳур.

Лаборатория, архивное фото - Sputnik Тоҷикистон
Соҳибкоре дар шаҳри Бӯстон корхонаи дорусозӣ бунёд кард

Эмомалӣ Раҳмон ба роҳбарияти мақомоти иҷроияи ҳокимияти давлатии вилоят ва шаҳру ноҳияҳо, инчунин вазорату кумитаҳои дахлдор супориш додааст, ки камбудиҳои ҷойдоштаро дар самти татбиқи босифату саривақтии барномаҳои гуногуни рушди иқтисодиву иҷтимоӣ бартараф намоянд. Нишондиҳандаҳои даромади буҷетро таъмин, бақияпулиҳои андозро коҳиш дода, аз хароҷоти дуюмдараҷа худдорӣ намоянд. Инчунин барои таъмин кардани маблағгузории лоиҳаҳои рушди инфрасохтор ва лоиҳаҳои дорои аҳамияти иқтисодиву иҷтимоӣ тадбирҳои иловагӣ андешанд.

Вазифаҳои дигар ҳамчунин вобаста ба иҷрои саривақтию босифати корҳои саҳроӣ, кишту кори такрорӣ, ҷамъоварии беталафи ҳосили парваришшуда, рушди соҳаи саноат, истифодаи пурраи иқтидорҳои саноатии корхонаҳои амалкунанда, бунёди корхонаҳои нав, таъсиси ҷойҳои корӣ, афзоиши истеҳсоли маҳсулоти босифату воридотивазкунанда ва таъмини бозорҳои дохилӣ бо маҳсулоти кишоварзӣ ва захираи зарурии маводи озуқа, дода шуд.

Раисҷумҳур аз афзоиши ҳолатҳои зиёди ғайриқонунӣ ҷудо намудани қитъаҳои замин дар баъзе шаҳру ноҳияҳои вилоят изҳори нигаронӣ карда, баҳри аз байн бурдани чунин қонунвайронкуниҳо ба масъулин дастуру супоришҳои қатъӣ додааст.

Супоришҳо ҳамчунин доир ба риояи талаботи қонунгузорӣ дар бораи танзими анъана ва ҷашну маросим, истифодаи сарфакоронаи нерӯи барқ ва фаъолияти мунтазами иншооти энергетикӣ, захираи маводи сухт дар давраи зимистонгузаронӣ, пардохти саривақтии ҳаққи истифодаи неруи барқ аз ҷониби истеъмолкунандагони вилоят дода шуд.

Эмомалӣ Раҳмон сатҳи ҷинояту ҷинояткориро дар ҳудуди вилоят таҳлил намуда, вобаста ба ислоҳи камбудиҳо дар ин самт ва пешгирию коҳиш додани сатҳи ҷинояткорӣ дар назди Мақомоти ҳифзи ҳуқуқ ва Мақомоти иҷроияи ҳокимияти давлатӣ вазифаҳои мушаххас гузоштааст.

Дар кори машварат ҳисоботи раиси вилояти Суғд Абдураҳмон Қодирӣ ва раисони як қатор шаҳру ноҳияҳои вилоят оид ба натиҷаи фаъолияти бахшҳои хоҷагии халқи вилоят давоми соли 2017, рафти татбиқи супоришҳои Президенти мамлакат аз Паёми навбатӣ ба Маҷлиси Олӣ ва иҷрои дигар дастуру ҳидоятҳои Эмомалӣ Раҳмон шунида шуд.  

Лентаи хабарҳо
0