ДУШАНБЕ, 4 июл — Sputnik. Президенти Русия Владимир Путин қонуни федералӣ дар бораи ба тасвиб расидани созишнома оид ба ҳамкориҳо бо Тоҷикистон дар соҳаи таъмини маҳсулоти нафтиро ба имзо расонд, ҳуҷҷат дар торномаи иттилоотии ҳуқуқӣ нашр шудааст.
Созишнома ҳунӯз 6 феврали соли 2013 дар шаҳри Маскав қабул гардида буд.
Созишнома ба тақвият бахшидани ҳамкориҳои мутақобилан судманд дар соҳаи таъмини Тоҷикистон бо маҳсулоти нафтӣ равона шуда, ба рушди ҳамкориҳои тиҷоратию иқтисодӣ дар асоси муносибатҳои чандинсолаи ду кишвар мусоидат хоҳад кард.
Маҳсулотҳои нафтӣ набояд ба кишварҳои сеюм содирот шавад. Чунин маҳдудият ҳамчунин ба маҳсулоти нафтие, ки аз ҷониби Федератсияи Русия истеҳсол шуда ба Тоҷикистон ва дигар кишварҳои аъзои Иттиҳоди гумрукӣ интиқол дода мешавад дахл дорад. Дар сурати вайрон намудани қонуни содироти бозпас ҷониби Русия ҳуқуқ дорад интиқоли маҳсулоти нефтиро бидуни боҷи гумрукӣ боздорад.
