ДУШАНБЕ, 29 сен — Sputnik. Ҷангандаҳои ҳавоии эътилофи арабӣ ба ҷониби хаймаҳои наварӯсон дар маҳаллаи ал-Ваҳгаи шаҳри Моҳа, воқеъ дар соҳили баҳри Сурх мушак партоб карданд, дар пайи он даҳҳо нафар ҳалоку теъдоди аз одамон ҷароҳат бардоштанд, иттилоъ медиҳад РИА Новости бо истинод ба хабаргузории ямании "Хабар Нюс".
"Ҳавопаймоҳои марбути эътилофи арабӣ ба хаймаҳои наварӯсон чанд мушак партоб карданд, дар яке аз ин хаймаҳо занони ба ҷашни арӯсӣ даъватшуда ҳузур доштанд",- қайд мекунад оҷонсӣ.
Хабаргузорӣ шумори дақиқи кушташудагон ва маҷрӯҳонро наменависад, аммо мегӯяд, наҷотдиҳандагон дар маҳалли ҳодиса ба захмиён кӯмак мерасонанд.
26 марти соли равон дар Яман амалиёти байналмилалии низомӣ шурӯъ гардид, ки дар он кишварҳои минтақа аз қабили Арабистони Саудӣ, Кувайт, Баҳрайн, АМА ва Қатар ширкат доранд. Амалиёт баъд аз пахши изҳороти Шӯрои ҳамкории давлатҳои Халиҷи Форс ва дархости президенти Яман Абд Раббу Мансур Ҳодӣ оғоз ёфта буд.
