ДУШАНБЕ, 17 дек — Sputnik. Донишҷӯи курси 3-и Донишкадаи геологияи шаҳри Хоруғ сешанбеи гузашта бо 10 кг ҳашиш дастгир шудааст, хабар медиҳад хадамоти матбуотии Вазорати корҳои дохилӣ.
Ба иттилои манбаъ, ҷавон мусофири автомашинаи "Тайота-Ланд-Крузер", таҳти идораи сокини 37 солаи Хоруғ будааст.
"Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия дар дохили автомашинаи мазкур борхалтаи варзишии мусофир 19-сола, донишҷӯ 10 киллою 710 грамм маводи нашъадори навъи ҳашиш, дарёфт ва мусодира карда шуд",-афзуд манбаъ.
Дар робита ба ин нисбат ба донишҷӯ парвандаи ҷиноӣ боз шуда, чораҳои тафтишоти оид ба иштироки ронанда дар қочоқи маводи мухаддир рафта истодааст.
Худи ҳамон рӯз дар наздикии Бозори "Мардон"-и пойтахт сокини 42 солаи ноҳияи Рӯдакӣ дастгир шуд. Ҳангоми азназаргузаронии автомашинаи шахсиаш тамғаи "Мерседес-Бенс", аз дохили борхалтааш 990 грамм маводи нашъадори навъи афюн дарёфт ва мусодира гардид. Инчунин, ҳангоми азназаргузаронии хонаи хоҳараш 22 киллою 680 грамм маводи нашъадори навъи афюн дарёфт ва мусодира карда шуд.
