ДУШАНБЕ, 5 дек — Sputnik. Ба иттилоъи дафтари матбуотии раисҷумҳури Тоҷикистон, Эмомалӣ Раҳмон имрӯз бо фармоне Қозидавлат Қоимдодовро ба сабаби ба нафақа баромаданаш аз симатҳои сафири фавқулода ва мухтори Ҷумҳурии Тоҷикистон дар Ҷумҳурии Белорус, сафири фавқулодда ва мухтори Ҷумҳурии Тоҷикистон дар Ҷумҳурии Литва, сафири фавқулода ва мухтори Ҷумҳурии Тоҷикистон дар Ҷумҳурии Латвия, сафири фавқулодда ва Мухтори Ҷумҳурии Тоҷикистон дар Ҷумҳурии Эстония ва Намояндаи доимӣ ва ваколатдори Ҷумҳурии Тоҷикистон дар назди мақомоти расмӣ ва мақомоти дигари Иттиҳоди Давлатҳои Мустақил озод кард.
Раисҷумҳур бо фармоне дигар Муҳаммадшариф Ҳақдодро сафири фавқулода ва мухтори Ҷумҳурии Тоҷикистон дар Ҷумҳурии Белорус таъйин кард.
Бо фармоне дигар Муҳаммадшариф Ҳақдод Намояндаи доимӣ ва ваколатдори Ҷумҳурии Тоҷикистон дар мақомоти расмӣ ва дигар ниҳодҳои Иттиҳоди Давлатҳои Мустақил таъйин шуд.
Вай ҳамчунин бо қарори Ҳукумати Ҷумҳурии Тоҷикистон аз симати муовини вазири умури хориҷии ҶТ озод ва Зоҳир Саидзода дар ин симат ҷойгузинаш шудааст.
