15:52 26 июли 2017
Пахши мустақим
Хушруз ва Имомалишо

Ҳунарнамоии зиндаи Имомалишо Муборакшо ва Хушрӯз Бахтоваршо дар Маскав

© Фото: Sputnik
Тоҷикистон Style
Гирифтани линки кӯтоҳ
122983

Ду ҳунарманди боистеъдод ва ҷавон - Имомалишо ва Хушрӯз ҳадаф гузоштаанд, ки бар хилофи тамоюли фонограммасароӣ дар ҷаҳони мусиқӣ танҳо бо овози зинда ҳунарнамоӣ кунанд

ДУШАНБЕ, 8 май — Sputnik. Дирӯз, 7 май дар Маскав аввалин барномаи ҳунарии Имомалишо ва Хушрӯз баргузор шуд. Ба дидори ҳунармандони боистеъдоди Бадахшон ҷавонони тоҷик омада буданд.

Мероси падар хоҳӣ….

Хушрӯз ва Имомалишо писарони ҳунармандони барҷастаи Тоҷикистон — Муборакшо Мирзошоев ва Олуча Муҳаббатшоҳ мебошанд. Муборакшо гарчи умри кӯтоҳ дошт, вале номашро абадӣ боқӣ гузошт.

Олуча-падари Хушруз аз беҳтарин сарояндагони мардуми Бадахшон ба шумор меравад.

Муҷрии ин барномаи ҳунарӣ Шерози Ҷобир буд. Ӯ низ писари яке аз ҳунармандони номдори театри марказии шаҳри Хоруғ аст. Ҳар се ҳам касби падарони худро пеша кардаанд.

Шероз нахуст тамошобинонро ба муносибати 72-юмин солгарди Рӯзи Пирӯзӣ муборакбод намуда, консертро ба номи ҷовидонии Муборакшо оғоз кард.

"Асрҳо мегузаранд, вале номи Муборакшо зиндаву ҷовидон аст. Ӯ дар қалби ҳар яки мо бо ҳунари барҷаста ҷой гирифт",-гуфт Шероз.

Бо оғози барномаи ҳунарӣ дар саҳна Имомалишо ва Хушруз пайдо шуданд. Онҳо якҷоя тамошобинон ва меҳмонони консертро хушомадед гуфта ба сурудани таронаҳояшон пардохтанд.

Аз "Парвиннамо" то "Нола дар дил дорам"

Имомалишо дар барнома таронаҳои падарашро сароид.

Вай таронаҳои  "Парвиннамо",  "Равон шуданд чор ҷавон", "Туро намепарстам" ва "Ғариби"-ро иҷро кард. Тамошобинон намегузоштанд, ки Имомалишо худро дар саҳна танҳо эҳсос кунад. Ҳама баробари ӯ ҳамовозӣ мекарданд.

Имомалишо Муборакшо
© Фото: Sputnik
Имомалишо Муборакшо

Хушрӯз пеш аз иҷрои таронаҳо изҳори шодмонӣ карда гуфт, ки "бовар надоштам, ки шумораи тамошобинонамон чунон зиёд мешавад".

Хушрӯз нахуст суруди "Нола дар дил дорам имшаб"-ро тақдими тамошобинон кард.

Дар идомаи барнома Хушрӯз оҳангҳои рақсӣ низ иҷро кард, ва тамошобинон майдони рақсро гарм карданд.

Танҳо бо овози зинда

Вақтҳои охир дӯстдорони ҳунар фаромӯш кардаанд, ки овозхон бояд барномаро зинда иҷро кунанд.

Имомалишо ва Хушрӯз ҳадаф гузоштаанд, ки бар хилофи тамоюли фонограммасароӣ дар ҷаҳони мусиқӣ танҳо бо овози зинда ҳунарнамоӣ кунанд.

"Падарам таронаҳоро ҳамеша бо овози зинда иҷро мекард. Ман низ ҳадаф дорам, ки роҳи падарамро идома диҳам",-гуфт Имомалишо дар суҳбат бо Sputnik Тоҷикистон.

07.052017 концерт "Хушруз и Имомалишо"

Публикация от Shinov Beknazarov (@shinov6278) Май 8 2017 в 2:38 PDT

 

Хушрӯз мегӯяд, ки овозхон танҳо дар сурати зинда сароидан метавонад тамоми эҳсоси худро нишон диҳад.

"Ҳунарнамоии овозхон гуфтугӯи ҳунарманд ва тамошобин аст. Агар зинда насароӣ, тамошобинонро аз эҳсоси зиндаи худ огоҳ наметавонӣ кард",-бовар дорад Хушрӯз.

Барои модарон. Дидор бо ҳамсари Муборакшо

Байни тамошобинон меҳмонони зиёде аз шумули хешу табор, ҳамсинфону волидони ҳунармандон ҳузу доштанд. Пас аз он ки Хушрӯз суруди модарро иҷро кард, муҷрии барнома ҳамсари Муборакшоро ба саҳна хонд.

07.052017 концерт "Хушруз и Имомалишо"

Публикация от Shinov Beknazarov (@shinov6278) Май 8 2017 в 2:36 PDT

 

"Хонум Аввалмо аз хушбахттарин инсонҳоест, чун дар канори ҳунарманди барҷаста Муборакшо ба сар бурдааст",-гуфт Шероз.

Баъди суруди "Модар", Хушрӯз дигар навоҳои худро аз қабили "Барои ту", "Худованд" иҷро карда навбати сурудхониро ба Имомалишо дод.

Дар баробари ҳунармандони ҷавон дар консерт ҳамчунин "Рақси помирӣ" манзури тамошобинон шуд. Ҳунарнамоии Амонбегими хурдакак, ки бо забони русӣ суруди "Кукушка"-ро сароид ба барнома ранги дигар бахшид.

Ҳама ба рақс

Бозхонии таронаҳои Муборакшо — "Сабза ба ноз", "Духтари деҳқон", "Имшаб ба қиссаи дили ман", "Ай ёрам биё" дар иҷрои Имомалишо тамошобинонро ба ваҷд оварданд ва ҳама ба рақс пардохтанд.

  • Ҳамсар ва писари Муборакшо
    Ҳамсар ва писари Муборакшо
    © Фото: Sputnik
  • Тамошобинон дар консерти Имомалишо ва Хушруз
    Тамошобинон дар консерти Имомалишо ва Хушруз
    © Фото: Sputnik
  • Сарояндаи хупдсол дар консерти Имомалишо ва Хушруз
    Сарояндаи хупдсол дар консерти Имомалишо ва Хушруз
    © Фото: Sputnik
  • Тамошобинон дар консерти Имомалишо ва Хушруз
    Тамошобинон дар консерти Имомалишо ва Хушруз
    © Фото: Sputnik
1 / 4
© Фото: Sputnik
Ҳамсар ва писари Муборакшо

Дар толор шефтагони ҳунари Муборакшо ҳузур доштанд, ки ба саҳна наздик мешуданду аз дасти Имомалишо мегирифтанд, гӯё ки Муборакшоро дидор карда бошанд.

Хонум Аввалмо-модари Имомалишо дар сӯҳбат бо Sputnik Тоҷикистон гуфт, ки Имомалишо ӯро ғайриинтизор дар ҳайрат гузошт.

"Ман бовар надоштам, ки Имомалишо имрӯз бо чунин санъати баланд сурудҳои падарашро иҷро мекунад. Сурудани таронаҳои Муборакшо кори осон нест",-гуфт модари Имомалишо.

"Ёдбуди Муборакшо"

Дар воқеъ ин нахустин ҳунарнамоии Имомалишо ва Хушрӯз буд, ки ба як ҷашни бузурги хонаводагӣ бадал гашту ҳамагон дар ин шом боз аз Муборакшо ба некӣ ёд карданд.

Муҷрии барнома Шероз ҷавгир шуду пешниҳоде кард, ки  ин консерт "Ёдбуди Муборакшо бошад". Ва ҳамон лаҳза қарор шуд, ки ҳар сол рӯзе дар Маскав ба ёди Муборакшо бигзарад.

Идомаи роҳ…

Ин нахустин ҳунарнамоии овозхонони ҷавон дар Маскав буд. Имомалишо ва Хушрӯз ният доранд, ки роҳи падарони худро идома диҳанд.

"Мо дар нақша дорем дар дигар шаҳрҳо низ барнома иҷро кунем. Чунончи дар наздиктарин рӯзҳо  ба Екатеринбург сафар хоҳем кард.",-гуфт Хушрӯз.

Хушрӯз ва Имомалишо ҳанӯз ҷавонанд, вале тавонистанд бе ёриву дастгирии дигарон  барномаи ҳунариеро дар Маскав баргузор кунанд.

Умедворем ин ҷавонон дар роҳи ҳунар комёбиҳои бузургеро ба даст оваранд.

Барчаспҳо:
7 май, консерт, Имомалишо Муборакшо ва Хушруз Бахтоваршо, Маскав

Мавзӯъҳои асосӣ