ДУШАНБЕ, 17 окт — Sputnik. Феҳрасти кишварҳои мавриди таваҷҷӯҳи сайёҳон дар ду сол як маротиба аз ҷониби Форуми ҷаҳонии иқтисодӣ бароварда мешавад.
Тоҷикистон дар зинаи 119-ум қарор гирифта, Узбакистону Туркманистон дар рейтинг нишон дода нашудаанд.
Аз байни кишварҳои Осиёи Марказӣ Қазоқистон бо гирифтани мақоми 85-ум нишондоди беҳтарин нишон дод. Қирғизистон мақоми 116-умро соҳиб шуд.
Муаллифони рейтинг зимни баҳогузорӣ 14 нишондодро ба назар мегиранд, аз ҷумла: фазои корӣ, амният, инфрасохтори роҳи мошингард ва ҳавоӣ, бойгариҳои табиӣ ва фарҳангӣ, нарх ва қоидаи раводид.
Дар раддабанд 141 кишвар нишон дода шудааст. Дар рӯйхати панҷгонаи аввал Испания, Фаронса, Олмон, ИМА ва Британия ҷой гирифтаанд. Италия дар мақоми 8-ум ҷой гирифта, Юнон дар ҷойи 31-ум аст, Туркия бошад мақоми 44-умро аз худ кардааст. Аз байни кишварҳои собиқ Иттиҳоди Шӯравӣ аз ҳама пеш Эстония ҷой гирифтааст (ҷойи 38). Дар охири ейтинги кишварҳои мавриди таваҷҷӯҳи сайёҳон Ангола, Гвинея ва Чад ҷой гирифтаанд.
Русия дар мақоми 45-ум ҷой гирифтааст.
Ёдовар мешавем, ки қаблан коршиносони Форуми ҷаҳонии иқтисодӣ Тоҷикистонро аз ҷиҳати кишвари амн дар мақоми 76 ҷой доданд.
