ДУШАНБЕ, 8 ноя — Sputnik. Комиссияи марказии интихобот ва райъпурсии Ҷумҳурии Тоҷикистон маълумоти иштироки нозири Тоҷикистонро дар интихоботи ИМА рад кард.
"Корманди КМИВР Далер Сафар дар Вашингтон на ба сифати нозири байналмиллалӣ аз ҷониби Тоҷикистон ҳозир шудааст, балки дар чорчӯбаи барномаи "Ҷаҳони кушод" сафар намудааст, ки то санаи 12-уми ноябр давом меёбад",- гуфтанд аз комиссия.
Ба гуфтаи онҳо мониторинги рафти овоздиҳӣ ба барномаи сафар дохил намешавад.
Барномаи "Ҷаҳони кушод" ягона баномаи байналмиллалиест, ки аз ҷониби конгресси Амрико маблағгузорӣ карда мешавад. Мақсади барнома шинос намудани иштирокчиён бо тарҷибаи гузаронидани интихобот ва рафти овоздиҳӣ дар ИМА мебошад. Барои ин иштирокчиёнро бо фаъолияти ҳукуматҳои давлатӣ, маҳаллӣ ва федералии ИМА шинос мекунанд.
Пештар дар якчанд қатор ВАО маълумот интишор гардид, ки мувофиқи он Тоҷикистон бори аввал ба ИМА аз ҳисоби сафоратхонаи ИМА дар кишвар, нозир равон мекунад.
