ДУШАНБЕ, 29 ноя — Sputnik. Ҳарбиёни пойгоҳи 201-уми Русия дар Тоҷикистон дар барномаи машқҳои тактикӣ таҳти унвони "Шит-2016" иштирок карданд, хабар медиҳад хадамоти матбуоти ОҲМ.
Ба омӯзиши муштарак зиёда аз 10 ҳазор низомиёни Тоҷикистону Русия ва беш аз 1,5 ҳазор адад техника ҷалб карда шуданд.
Дар давоми се рӯзи тамрин мақомоти қудратӣ ҳалли вазъияти бӯҳрониро машқ карданд.
Ҳамчунин қайд мешавад, ки диққати асосӣ ба иҷрои амалиёти муштарак бо низомиёни вазорати мудофиа, сарҳадбонон ва артиши миллии Ҷумҳурии Тоҷикистон равона карда шуд.
Пойгоҳи низомии 201-уми ФР бузургтарин иншооти ҳарбии Русия дар хориҷ аз он кишвар маҳсуб меёбад. Ҷузву томҳои он дар шаҳрҳои Душанбе ва Қӯрғонтеппа мустақар мебошанд. Моҳи сентябри соли равон иқтидори пойгоҳ бо ҳузури чархболҳои низомӣ дар фурудгоҳи Айнӣ, 30 километрии Душанбе тақвият ёфт. Бар пояи тавофуқномаи дуҷонибаи ФР ва ҶТ аз соли 2012, пойгоҳи 201-ум то соли 2042 дар қаламрави Тоҷикистон боқӣ мемонад.
