ДУШАНБЕ, 8 дек — Sputnik. Дар шаҳри Душанбе бо иштироки сарвари давлат Эмомалӣ Раҳмон Маркази барқу гармидиҳии "Душанбе 2" ифтитоҳ ва 700 нафар бо ҷои кор таъмин шуданд, хабар медиҳад хадамоти матбуоти президенти ҶТ.
Хишти аввали сохтмони навбати дуюми маркази барқу гармидиҳӣ бо иқтидори 300 мегават аз тарафи президенти Ҷумҳурии Тоҷикистон Эмомалӣ Раҳмон ва раиси Ҷумҳурии Мардумии Чин Си Ҷинпин моҳи сентябри соли 2014 гузошта шуда буд ва он имрӯз аз тарафи Эмомалӣ Раҳмон ба истифода дода шуд.
Президенти мамлакат Эмомалӣ Раҳмон дар толори агрегатҳо парда аз болои лавҳаи рамзӣ бардошта, ба Маркази идоракунии ин иншооти муҳими энергетикӣ бо пахши тугма ба фаъолияти навбати дуюми Маркази барқу гармидиҳии Душанбе — 2 расман оғоз бахшид.
"Раиси ҷумҳур ба фаъолият оғоз кардани ин иншооти муҳими соҳаи энергетикаро муборакбод гуфта, изҳор доштанд, ки татбиқи он барои расидан ба истиқлолияти комили энергетикӣ қадами муҳиму назаррас мебошад",-омадааст дар иттилоия.
Манбаъ хабар медиҳад, ки баробари бунёди марказ беш аз 700 нафар сокинони маҳаллӣ, бахусус ҷавонони ихтисосманд бо кори доимӣ таъмин шуданд.
Арзиши умумии лоиҳа 349 миллион доллари амрикоӣ буда, аз он 17 миллиону 443 ҳазор доллар саҳми ҳукумати Ҷумҳурии Тоҷикистон аст. Пудратчии асосии сохтмон ширкати ТВЕА-и Чин мебошад.
