ДУШАНБЕ, 4 июл — Sputnik. Бино ба иттилоъи равобити умумии вазорати фарҳанг, чорабиниро президенти Фарҳангистон, Фарҳод Раҳимӣ оғоз бахшида, иштирокчиёни мактаби байналмилалии тобистонаро ба Тоҷикистон хайрамақдам гуфт.
Мактаби байналмилалии тобистонаи бостоншиносони ҷавон дар шаҳри Бостонии Ҳулбук" бо ибтикори Вазорати фарҳанг ва Фарҳангистон бо дастгирии Бунёди байналхалқии кишварҳои ИДМ ташкил мешавад.
Имсол ин мактаб аз 2 то 8 июл дар минтақаи Кӯлоб идома меёбад. Ба мактаби тобистона бостоншиносони ҷавон аз Арманистону Белорус, Қазоқистону Қирғизистон, Молдова ва Озорбойҷон, Русия ва Украинаю Тоҷикистон ширкат мекунанд.
Рӯзи 3 июл қабл аз маросими кушодашавӣ иштирокчиён аз Осорхонаи бостонии Ҷумҳурии Тоҷикистон дидан намуда, бо нигораҳои таърихии осорхона шинос гардиданд. Шоми 3 июл иштирокчиён ба шаҳри Кӯлоб сафар карданд.
Мувофиқи барнома баргузории ҷаласаҳо дар Донишгоҳи давлатии Кӯлоб ва Мамнуъгоҳи таърихию фарҳангии "Ҳулбук", машғулиятҳои илмию амалӣ дар мавзеи таърихии Ҳулбук дар назар аст.
Дар назар аст, ки бостоншиносони ҷавон ҳамчунин аз кӯҳи намаки Хоҷа Мӯъмини воқеъ дар ноҳияи Восеъ ва мавзеи Чилдухтарони ноҳияи Мӯъминобод дидан хоҳанд кард.
