ДУШАНБЕ, 13 июл — Sputnik. Раисҷумҳури Тоҷикистон Эмомалӣ Раҳмон қарори ҷудо кардани 3 милюн сомонӣ барои фароҳамсозии шароити истироҳати кӯдакону наврасон дар урдугоҳҳои тобистонӣ имзо кардааст.
Раисҷумҳур бо ин қарор раисони ҳукуматҳои вилояти мухтори Кӯҳистон Бадахшон, дигар вилоятҳо, шаҳри Душанбе ва дигар шаҳру ноҳияҳо ва вазорату созмонҳои давлатиро муваззаф кардааст, ки сохтусозу таъмиру таҷҳизи сохтмонҳо, майдонҳои варзишӣ, ҳавзҳои шино, дарахткории урдугоҳҳоро дар муҳлати муқарраршуда ба анҷом бирасонанд.
Бояд гуфт, ки ҳамагуна урдугоҳҳо танҳо бар асоси арзёбии созмони давлатии назорати беҳдоштиву вогирзудоӣ оғоз ба кор мекунанд.
Ин урдугоҳҳо дар навбати аввал кӯдакону наврасони ятиму бесарпараст, камнаво ва ҳамчунин тезҳушу лаёқатмандро дар бар хоҳанд гирифт.
Раисҷумҳур Вазорати маорифро муваззаф кардааст, ки урудугоҳҳоро бо омӯзгорону мураббиҳо таъмин кунад ва раванди омӯзишу парваришро дар онҳо роҳандозӣ кунад.
Вазорати тандурустӣ муваззаф шудааст, ки урдугоҳҳоро бо кадрҳои пизишкӣ таъмин кунад ва вазъи беҳдоштии онҳоро зери назар бигирад.
Таъмини амнияти кӯдакону наврасон дар урдугоҳҳо ва эминии рафту баргашташон ба маконҳои истироҳат бар уҳдаи Вазорати умури дохила вогузор шудааст.
