ДУШАНБЕ, 23 сен — Sputnik. Дар додгоҳи Шербинскийи Маскав баррасии парвандаи задухӯрд дар мазори Хованский, ки дар моҳи майи соли гузашта рух дода буд, идома дорад.
Бино ба гузоришҳои расонаҳои хабарӣ аз кулли ширкаткунандагони задухӯрд дар ин мазор, ки шуморашон аз 200 то ба 300 тан мерасид, танҳо 5 тан дар курсии мутаҳҳамон нишастаанд ва ҳамаи онҳо шаҳрвандони Тоҷикистон мебошанд.
Муттаҳамон — Шоимардон Аҳмадов, Ҳоҷиқурбон Бӯриев, Раҳмуддин Садурдинов, Ҷомӣ Чакалов ва Диловар Юнусов гуноҳи худ дар ин задухӯрдро такзиб мекунанд. Бар асоси бозрасӣ, сабаби задухӯрд умури қабристон буд.
Муҳоҷирони маҳаллӣ ба ивази музди камтаре ба умури мазори Хованский расидагӣ мекарданд. Аҳли Маскав аз кори муҳоҷирон айбҷӯӣ намекарданд. Хидматрасонии муҳоҷирон арзон буд. Аҳли хонаводагони муттаҳамон мегӯянд, ки гурӯҳе мехостанд, ки ин "соҳибкорӣ"-ро таҳти назорати худ дароваранд. Онҳо аз муҳоҷирон тақозо карда буданд, ки аз даромади худ "молиёт" супоранд. Аммо даромади муҳоҷирон қобили "молиётсупорӣ" набуд.
Баъид ин гурӯҳ омаданд ва ба муҳоҷирон ҳамла карданд. Ба гуфтаи мушоҳидакунандагон, дар курсии муттаҳамон ширкаткунандагони задухӯрд нишастаанд. Бозрасӣ бояд созмондиҳандагони задухӯрдро кашф кунад.
