ДУШАНБЕ, 6 ноя — Sputnik. Духтарони тезҳуши тоҷик Ёсуман Исмонзода ва Манида Тошболтаева, ки чанде пеш дар барномаҳои телевизионии Русия дурахшида буданд, ин бор ҳамроҳ бо дигар ҳамсабақҳояшон баранда шуданд.
Ба гузориши равобити умумии омӯзишкадаи "Империя знаний", Ёсуман, Манижа ва дигар шогирдони ин омӯзишкада дар олимпиади байналмилалии риёзии зеҳнӣ дар Маскав 12 медол, аз ҷумла 5 медоли тилло, 5 нуқра ва 2 биринқӣ ба даст оварданд.
Шогирдони Омӯзишкадаи риёзии зеҳнӣ "Империя знаний" дар озмуни ҳуши риёзӣ "GeniusKid-2017" дар шаҳри Маскав ҷои аввалро ба даст оварда ва Ҷоми озмуни тезҳуширо ба Тоҷикистон бурданд.
Дар ин озмун 250 кӯдаку наврас аз 6-сола то 15-сола ширкат карданд. Аз Тоҷикистон дар ин озмун 15 кас ширкат кард, ки ҳамаашон шогирдони Омӯзишкадаи риёзии зеҳнии шаҳри Душанбе "Империя знаний" ҳастанд.
Пеш аз ин озмун шогирдони ин омӯзишкада бо сафири Тоҷикистон дар Русия Имомуддин Сатторов дидор карданд. Вай дар ин дидор ба кӯдакону наврасон дар озмун пирӯзӣ орзу кард.
Ёдоварӣ мекунем, ки Ёсуман Исмонзода ва Манижа Тошболтаева чанде пеш дар барномаи "Удивительные люди" дар шабкаи телевизионии "Россия 1" ширкат карда ва бо тезҳушии худ мардумро шигифтзада карда буданд.
Ёсуман Исмонзода ба осонӣ метавонад рақамҳои дурақамӣ ва серақамиро дар зеҳнаш зарбу тақсим кунад.
Манижа Тошболтаева бо чашм суръати ҳаракати худравҳоро муайян мекунад, ки барои ин қобилияташ доварон ӯро "духтар-радар" унвон карданд.
