ДУШАНБЕ, 26 ноября — Sputnik. Ба гузориши равобити умумии ин созмон, дар паи баргузории амалиёти бозҷӯӣ кормандони Раёсати Ожонс дар вилояти Суғд фаъолияти гурӯҳи созмонёфтаи қочоқи маводи мухаддирро дар ҳудуди ин вилоят ошкор кардаанд.
Бино бар ин гузориш, Муҳаммад Шарифов ном шаҳрванд аз ноҳияи Масчо бо ваколатдори калони оперативии ШКҶ ШВКД ҶТ дар вилояти Суғд Руслан Шарипов аз шаҳри Хуҷанд ҳамдаст шуда ва маводи мухаддир қочоқ мекардаанд.
Кормандони Ожонс ин ду табаҳкорро 22 ноябр ҳангоми муомилоти ғайриқонунии маводи мухаддир дастгир карда аз онҳо ба миқдори 34 килуграму 759 грам афюн ва 47 килуграму 157 грам ҳашиш, ки ҷамъан 81 килуграму 916 грамро ташкил медиҳад, ёфта ва мусодира кардаанд.
"Вобаста ба ҳолати зикргардида нисбат ба Шарифов Муҳаммад Шарифович ва Шарипов Руслан Алимович бо моддаи 200, қисми 4 банди «д»-и Кодекси ҷиноии Ҷумҳурии Тоҷикистон парвандаи ҷиноятӣ оғоз гардида, тафтишоти пешакӣ идома дорад", — гуфта мешавад дар иттилоиъя.
