ДУШАНБЕ, 20 июл — Sputnik. Раҳматулло Мирбобоев, муовини аввали вазири маориф ва илми Тоҷикистон, зимни нишасти матбуотӣ дар Душанбе гуфт, гуруҳи мазкур асосан ба таҳия ва дастрас намудани китобҳои дарсӣ бо забони узбакӣ машғул мешавад.
Ба иттилои Мирбобоев феълан дар кишвар 77 муассисаи таълимӣ комилан бо забони узбакӣ фаъолият мекунанд. Ӯ афзуд, ки инчунин дар 426 муассисаи дигар, таҳсили талабаҳо бо ду забон-тоҷикӣ ва узбакӣ роҳандозӣ шудааст.
Дар мавриди созиши раисиҷумҳурони Тоҷикистону Узбакистон барои бунёди макотиб дар қаламрави ҳамдигар масъулини Вазорати маориф изҳор доштанд, ки Тоҷикистон дар Самарқанд мактаб ва дар Фарғона кӯдакистон бунёд хоҳад кард. Ҷониби Узбакистон дар ноҳияи Спитамен мактаб ва дар Қубодиён бунгоҳи тиббӣ хоҳад сохт.
