ДУШАНБЕ, 26 янв — Sputnik. Аъзои комиссия баъди анҷоми боздиди дастархонҳо натиҷагирӣ намуда, бо назардошти шартҳои пешниҳодшудаи Низомномаи озмуни “Дастархонороӣ” ғолибонро бо тариқи баҳодиҳии алоҳида барои ҳар як нишондод ва ҷамъбасти холҳо муайян намуданд, иттилоъ додааст дафтари матбуотии Кумитаи дин.
Манбаъ афзудааст, ки 24-уми феврал дар шаҳри Душанбе даври сеюм ва ҷамъбастии озмуни “Дастархонороӣ” баргузор гардид. Дар даври ниҳоӣ намояндагони 17 шаҳру ноҳияи кишвар, ки дар давраи дуюми озмун ғолиб гардида буданд, ширкат намуданд.
Ҳайати ҳакамон аз дастархонҳои пешниҳоднамудаи иштирокчиён боздид намуда, вобаста ба ҳар як дастархон, интихоби дастархон ва мавҷудияти аломатҳои миллӣ дар он, сарфакорона оростани дастархон, зебо, хушоянд ва дилписанд будани он, истифодаи зарфҳои миллӣ ва интихобу ҷобаҷогузории дурусти онҳо дар дастархон ва амсоли он ба ҳар як дастархон баҳогузорӣ намуданд.
Тибқи хулосаи комиссияи мазкур ноҳияҳои Шоҳмансури шаҳри Душанбе ва Мурғоби ВМКБ сазовори ҷойҳои аввал ва мукофоти пулӣ ҳар кадом ба миқдори даҳ ҳазор сомонӣ гардиданд.
Ноҳияи Айнӣ барои иштироки фаъолона ба ҷойи ифтихорӣ ва мукофоти пулӣ ба миқдори ду ҳазор сомонӣ ва иштирокчии ҷавонтарин аз ноҳияи Файзобод Мирзоева Муҳиба барои иштироки фаъолона ба ҷойи ифтихорӣ ва мукофоти пулӣ ба миқдори як ҳазор сомонӣ сазовор дониста шуданд.
Зимнан, озмуни “Дастархонороӣ” аз ҷониби Кумитаи дин, танзими анъана ва ҷашну маросими назди Ҳукумати Тоҷикистон эълон гардид ва давраҳои якуму дуюми он дар ҳудуди шаҳру ноҳия ва вилоятҳои кишвар ҷамъбаст гардиданд.
