ДУШАНБЕ, 16 июл — Sputnik. Шоми дирӯз дастаи мунтахаби Тоҷикистон аз тими миллии Кореяи Шимолӣ бар ҳисоби 1:0 шикаст хурд. Ягона тӯбро ба дарвозаи тими Тоҷикистон дар дақиқаи 33-юми бозигарӣ кореягӣ Ри Ҷун ворид намуд.
Новобаста аз он ки дастаи тими миллии Тоҷикистон дар бозии гузашта шикаст хурд дастаи мунтахаб ба бозии ниҳоӣ, ки интизор меравад 19 июли соли равон доир шавад, роҳ ёфт.
Ёдрас мешавем, ки дар ду бозии қаблӣ футболбозони тоҷик бар дастаҳои мунтахаби Ҳиндустон (4:2) ва Сурия (2:0) пирӯзӣ ба даст оварда, соҳиби 6 имтиёз гаштанд. Баъди анҷоми бозӣ миёни дастаҳои мунтахаби Ҳиндустон ва Сурия, 16 июл ҳарифи навбатии дастаи мунтахаби Тоҷикистон маълум хоҳад шуд.
Фатҳулло Фатҳуллоев бошгоҳашро иваз кард
Иштирок дар мусобиқаи “Hero Interсontinental Cup 2019” барои дастаи мунтахаби Тоҷикистон марҳилаи омодагӣ ба даври дуюми интихобии Чемпионати ҷаҳон-2022 ба шумор меравад.
Мавриди зикр аст, ки Рустам Ятимов, дарвозабони дастаи миллии мамлакат дар вохӯрии дастаҳои мунтахаби Тоҷикистон ва Сурия беҳтарин бозигар дониста шуд. Рустам баъди бозӣ аз ҷониби масъулини мусобиқа бо 2500 доллар қадрдонӣ шуд.
Ёдовар мешавем, ки дар бозии аввал низ маблағи пулӣ барои беҳтарин футболбоз насиби узви дастаи мо Муҳаммадҷон Раҳимов гардида буд.
