Раҳмон дар Рӯзи ваҳдат ба тоҷикистониён чӣ гуфт - видео

Обуна шудан
Yandex newsTelegram
Раисҷумҳури Тоҷикистон дар паёми шодбошияш аз хатарҳои муосир ҳушдор дода, бар зарурати ҳифзи сулҳу субот дар ҷумҳурӣ таъкид намудааст
Эмомалӣ Раҳмон, раисҷумҳури Тоҷикистон бахшида ба 25-умин солгарди Рӯзи ваҳдати миллӣ гуфт, барои рушди кишвар, сулҳу оромӣ, суботи сиёсӣ ва ваҳдати миллӣ омили калидиянд.
Ӯ зикр кард, ки ба ҷо овардани фаризаҳои динӣ низ, ки ҷузъи муҳимми зиндагии мардуми мусулмони кишвар ба шумор мераванд, фақат дар шароити таъмин будани амният, сулҳу оромӣ ва суботи сиёсӣ муяссар шуда метавонад.
Раисҷумҳур афзуд, хоинону бадхоҳони давлату миллати тоҷик – онҳое, ки манфиатҳои милливу давлатиро қурбони нафс кардаанд ва имону виҷдони худро ба хоҷаҳои хориҷиашон фурӯхтаанд, ҳанӯз ҳам аз нияту нақшаҳои ғаразноки худ даст накашидаанд.
"Аз ин лиҳоз, мо бояд ҳамеша дар фикри ҳимояи сулҳу оромӣ, суботи сиёсӣ ва ваҳдати миллӣ бошем, зиракии сиёсиро аз даст надиҳем ва дар ғафлат намонем", - таъкид кард президент.
Маҳз дар ҳамин рӯз 25 сол қабл Эмомалӣ Раҳмон, президенти Тоҷикистон ва марҳум Саид Абдуллои Нурӣ, роҳбари Иттиҳоди мухолифини тоҷик дар шаҳри Маскав Созишномаи умумии истиқрори сулҳ ва ризоияти миллиро имзо намуданд.
Ин сана расман хотимаи ҷанги шаҳрвандӣ дар ҷумҳурӣ ба ҳисоб меравад, ки 5 сол - аз майи соли 1992 то 27 июни соли 1997 давом кард.
Рӯзи 27 июн, бар асоси қонуни Тоҷикистон дар бораи идҳо, чун Рӯзи ваҳдати миллӣ ва яке аз идҳои давлатии муҳим эълон гардидаст. Ин рӯз дар Тоҷикистон истироҳатӣ мебошад.
Лентаи хабарҳо
0