ДУШАНБЕ, 16 мая — Sputnik. Сафорати Тоҷикистон дар Русия аз мусобиқаи зеҳнии донишҷӯёни тоҷик дар Маскав хабар медиҳад.
Бозии интеллектуалӣ ба муносибати Соли ҷавонон ва 20-умин солгарди Рӯзи ваҳдати миллӣ гузаронида шуд.
Дар сабқати зеҳнӣ донишҷӯёни донишгоҳҳои бонуфузи Русия-Донишгоҳи давлатиии Маскав ба номи М.В. Ломоносов, Донишгоҳи дӯстии халқҳо, Донишгоҳи муносибатҳои байнулмилалии Маскав, Донишгоҳи ба номи Г. В. Плеханов ва Донишгоҳи иқтисодии Русия ширкат карданд.
"Дар бахши ниҳоии сабқат дастаи донишҷӯёни Донишгоҳи давлатии Маскав ба номи Ломоносов мақоми аввалро ба даст овард".
Ба ғолибон Кубоки созмони донишҷӯёни тоҷик дар хориҷ супорида шуд.
Ҷои дуюм насиби дастаи донишҷӯёни донишгоҳи дӯстии халқҳо шуд. Ҳамаи ширкаткунандгон бо ифтихорномаҳои сафорати Тоҷикистон дар Русия қадрдонӣ шуданд.
Сабқати зеҳнӣ аз ҷониби Созмони донишҷӯёни тоҷик дар хориҷ ташкил карда шуд.
