ДУШАНБЕ, 22 июн — Sputnik. ЮНЕСКО феҳристи тозаи забонҳои мирандаи ҷаҳонро нашр кардааст. Бино бар ин феҳрист, наздик ба сеяки забонҳои ҷаҳон дар ҳоли нест шудан қарор доранд. Бархе аз забонҳое, ки дар Тоҷикистон гӯишвар доранд, низ дар ин феҳрист оварда шудаанд.
Коршиносон забони паря ва гурӯҳе аз забонҳои помирӣ — язгуломӣ, рошорвӣ, бартангӣ ва ишкошимиро дар ҳоли нест шудан нишон додаанд.
Бар асоси ин гузориш, забони арабҳои Осиёи Марказӣ ва забонҳои яғнобӣ, рӯшонӣ ва вахонӣ рӯ ба нобудӣ ниҳодаанд ва забони шуғнонӣ дар вазъи нигаронкунанда қарор дорад.
Коршиносон ҳушдор медиҳанд, ки дар ояндаи наздик 2500 забон аз 6900 забони ҷаҳон нобуд хоҳанд шуд.
Пажӯҳишгарони ЮНЕСКО дар рафти таҳлил корбурди забонҳоро аз рӯи нӯҳ нишондод муайян кардаанд. Дар баробари ин коршиносон амалҳои нигаҳдорандаи забонро низ гуфтаанд, ки ин шумораи гӯишварон, интиқоли забон аз насл ба насл, дастрасӣ ба маводи хониш ва муносибати ҷомеа ба забонҳо мебошад.
