ДУШАНБЕ, 24 июн — Sputnik. Имрӯз, 24 июн, Эмомалӣ Раҳмон дар ноҳияи Сангвор аз гӯшаи намоишгоҳи кишоварзӣ дидан намуд.
Бино ба иттилои котиботи раисиҷумҳур, дар намоишгоҳ намунаи маҳсулоти кишоварзӣ ва ҳунарҳои дастӣ, ки расму анъанаҳои мардуми кӯҳистонро таҷассум мекарданд, ба маъраз гузошта шуд.
"Раисиҷумҳур ҳунари волои кадбонуҳои ин ноҳияи дурдасти кишварро, ки дар ин намоишгоҳ ба пӯхтани нонҳои лазиз машғул буданд, шоёни таҳсин хонда, барои омӯзиши он ба ҷавондухтарон дастуру ҳидоятҳо доданд",-омадааст дар хабарнома.
Таъкид гардид, ки бо ҳидоятҳои бевоситаи Эмомалӣ Раҳмон дар ноҳияи Сангвор ҷиҳати эҳё ва рушди ҳунару анъанаҳои миллӣ тадбирҳои зиёд андешида мешаванд ва таваҷҷуҳи ҷавондухтарон тайи солҳои охир ба омӯзиши онҳо бештар гардидааст.
Ҳама ба футбол: Раҳмон дар Тавилдара майдончаи варзишӣ ифтитоҳ кард
Дар намоишгоҳ ба раисиҷумҳур ҳамчунин занбӯрпарварони номдори ноҳияи Сангвор намудҳои гуногуни асали табииро, ки аз гулу гиёҳҳои нотакрори ин гӯшаи дорои табиати кишвар омода мешаванд, муаррифӣ намуданд.
Таъкид шуд, ки иқлими ноҳияи Сангвор барои занбӯрпарварӣ хеле мувофиқ буда, кишоварзон ҳамасола бо афзун намудани оилаҳои занбӯри асал маҳсулоти зиёди аз ҷиҳати экологӣ тозаву табобатӣ ба даст меоранд.
Эмомалӣ Раҳмон барои таҷлили Ваҳдати миллӣ ба водии Рашт рафт
Феълан дар ноҳияи Сангвор шумораи оилаҳои занбӯри асал ба 12 ҳазору 900 адад мерасад ва занбӯрпарварон нақша доранд, ин нишондодро боз ҳам афзун ва дар таъмини сокинон бо асали табиии худӣ ва содироти он ба хориҷ аз кишвар саҳми назаррас дошта бошанд.
