ДУШАНБЕ, 21 июл — Sputnik. Дар нимсолаи аввали соли 2015 мизони интиқолоти пулӣ ба Тоҷикистон $1 миллиарду 162 миллион шуд, ки нисбати ҳамин давраи соли гузашта 32% камтар мебошад, хабар дод имрӯз дар нишасти матбуотӣ раиси Бонки миллии Тоҷикистон Ҷамшед Нурмуҳаммадзода.
"Мо бо пешбиниҳои Бонки ҷаҳонӣ ва СБП, ки дар бораи коҳиши 40 дарсадӣ дар соли 2015 изҳори назар кардаанд, розӣ нестем. Коҳиш мешавад, вале камтар — ҳудуди 25-27%", — муътақид аст раҳбари БМТ.
Ҳамзамон Нурмуҳаммадзода мувофиқ аст, ки вазъи интиқолоти пули дар соли ҷорӣ бештар аз солҳои қаблӣ душвортар аст.
"Худ қазоват кунед — дар моҳҳои январ-март коҳиш дар сатҳи 34% буд, вале аз моҳи март то моҳи июн коҳиш дар сатҳи 29% шуд. Каме бошад ҳам, вале мизони интиқолот афзоиш ёфт, ки далели раванди манфӣ аст", — гуфт вай.
Ба ҷуз аз ин раиси Бонки миллӣ тавзеъ дод, ки миқдори аслии интиқолоти пулӣ бо рубли русӣ сурат мегиранд ва ҳаҷми онҳо 52 миллиард мебошад. Дар муқоиса бо соли гузашта ин мизон ба 5 миллиард рубли русӣ афзоиш ёфт.
Коҳиши интиқолоти пулӣ бо долларҳоро дар Бонки миллӣ ба беқурбшавии рубл дар қиболи доллари ИМА марбут медонанд.
Беш аз 90% интиқолоти пулӣ ба Тоҷикистон аз Русия фиристода мешаванд, ки дар он ҷо ҳудуди 1 миллион атбоъи кишвар дар муҳоҷирати корӣ қарор доранд.
Дар соли 2014 мизони интиқолоти пулӣ $3,9 миллиард шуд, ки мутобиқ ба 40% тавлидоти нохолиси милли кишвар мебошад.
