ДУШАНБЕ, 29 май — Sputnik. Вазири рушди иқтисод ва савдои Тоҷикистон Неъматулло Ҳикматуллозода мегӯяд, ҳоло Тоҷикистон наметавонад мақоми кишвари нозири Иттиҳоди АвруОсиёро ба даст орад.
"Ин масъаларо Тоҷикистон чанд сол аст, ки баррасӣ мекунад. Мо бодиққат таҷрибаи кишварҳоеро, ки ба наздикӣ ба ин иттиҳод ворид шудаанд, омӯхта истодаем. Аммо ҳоло дар бораи гирифтани мақоми кишвари нозири иттиҳод чизе гуфта наметавонем",- таъкид дошт вазир.
Пештар Русия ба Тоҷикистон пешниҳод карда буд, ки кишвар имконияти ба даст овардани мақоми кишвари нозири Иттиҳоди Авруосиёро бори дигар ҷиддӣ баррасӣ кунад.
"Мо дар заминаи даъватномаи дуҷониба ба ҷониби Тоҷикистон пешниҳод кардем, ки кишвар бори дигар ҷиддӣ масъалаи ба даст овардани кишвари нозири Иттиҳои иқтисодии АвруОсиёро баррасӣ кунад",- мегӯяд муовини аввали нахуствазири Русия Игор Шувалов.
Вай афзуд, ки ин мақом маънои узвият ба Иттиҳодро надорад, ягон ҷанбаи сиёсӣ надорад, вале ба гардиши коло ва рушди иқтисод мусоидат мекунад.
