Дар деҳаи Рошорви ВМКБ нерӯгоҳи хурд сохта шуд

© Sputnik / Сергей Мальгавко / Гузариш ба медиабонкЛинии электропередачи, архивное фото
Линии электропередачи, архивное фото - Sputnik Тоҷикистон
Обуна шудан
Сохтмони нерӯгоҳи барқии "Хатфат" дар деҳаи Рошорви ВМКБ пурра аз тарафи ширкати "Помирэнерҷӣ" маблағгузорӣ мешавад

ДУШАНБЕ, 11 сен — Sputnik. Баъди ду ҳафта дар деҳаи Рошорви Ҷамоати деҳоти Савноби ноҳияи Рӯшони Вилояти Мухтори Кӯҳистони Бадахшон неругоҳи хурди барқии "Хатфат" бо тавоноии 450 киловатт/соат мавриди баҳрабардорӣ қарор мегирад ва сокинони он бо нерӯи барқ таъмин мешаванд, хабар медиҳад АМИТ "Ховар".

Деҳаи Рошворв дар баландии беш аз 3 ҳазор метр аз сатҳи баҳр ҷойгир буда, назар ба дигар деҳоти вилоят фасли  зимистон дар ин деҳа зудтар фаро мерасад. Дар ин ҷо 193 хонавода зиндагӣ мекунанд.

Тибқи иттилои манбаъ, бунёди ин неругоҳро Ҷамъияти масъулияташ маҳдуди "Мадад" ба уҳда гирифтааст.

Сардори ҷамъияти мазкур Иван Ҳайдармамадов гуфт, ки  сохтмони неругоҳ пурра аз тарафи ширкати "Помирэнерҷӣ" маблағгузорӣ мешавад ва лоиҳаи бунёди сарбанд, ҳавзи танзими об, канали обпарто дар масофаи як километр, васли қубурҳои қутраш 700 мм, васлу насби агрегат ва хатҳои барқиро низ муҳандисони маҳаллӣ амалӣ месозанд.

Айни ҳол тамоми ин корҳо ба итимом расида, баъди анҷоми баъзе корҳои ҷузъӣ неругоҳи барқии «Хатфат» ба тавлиди неруи барқ оғоз мекунад.

Плотина, архивное фото - Sputnik Тоҷикистон
Барқ танҳо барои Ӯзбекистон: Тошканд пул ва шарти сохтмони 2 нерӯгоҳ дар Тоҷикистонро гуфт

Манбаъ аз қавли гуфтаи раиси Ҷамоати деҳоти Савноб Малабек Малабеков оварда, ки "дар деҳаи Рошорв то солҳои 90-уми асри гузашта неругоҳҳои хурди барқӣ бо иқтидори аз 2 то 5 киловатт/соат вуҷуд доштанд, аммо баъдан ин неругоҳҳо бо сабаби истифодаи зиёд фарсуда шуда, аз кор монданд. Соли 2000-ум сокинони деҳа барои ҳалли ин мушкил ба Пешвои миллат муроҷиат намуданд ва худи ҳамон сол бо дастури Сарвари давлат дар марҳилаи аввал ҳамаи сокинони деҳа бо батарейкаҳои офтобӣ ройгон таъмин гардиданд. Ҳамзамон мутахассисони Вазорати энергетика ва захираҳои оби Ҷумҳурии Тоҷикистон бо мақсади бунёди неругоҳи хурди барқӣ ба омӯзиши захираҳои обии рӯдхонаҳои кӯҳӣ, тарҳи канали обгузар ва макони ҷойгиркунии агрегатҳо машғул шуданд. Баъди омӯзишу таҳқиқоти ҳамаҷониба як сол пеш таҳкурсии неругоҳи хурди барқии "Хатфат" гузошта шуд".

Ҳоло сокинони деҳаи Рошорв бо  хати барқ таъмин шудаанд. То моҳи декабри имсол зиёда аз 300 хонаводаи деҳоти атроф низ ба ин неругоҳ пайваст мешаванд.

Лентаи хабарҳо
0