ДУШАНБЕ, 15 авг — Sputnik. Тибқи иттилои Вазорати умури дохилӣ ба мақомоти корҳои дохилӣ дар ноҳияи Сино-2 марди 35-сола, сокини ноҳияи Айнӣ муроҷиат карда, арз доштааст, ки 13-уми августи соли 2018, тахминан соати 23:00, шахси номаълум дар кӯчаи Н.Махсум, собиқ бозори "Зарнисор"-и шаҳри Душанбе худашро ронандаи кирокаш дар масири шаҳри Ҳисор муаррифӣ намуда, ӯро ба мошинаш савор кардааст.
Марди муроҷиаткунанда изҳор доштааст, ки ронанда бо ҳамроҳии рафиқонаш ӯро ба автомашинаи тамғаи "Мерседес-Бенс" савор карда, бо роҳи байни биноҳои истиқоматӣ ба кӯчаи Зарафшон оварда, лату кӯб намудаанд.
"Сипас бо корд номбурдаро таҳдид намуда, аз ӯ бо роҳи зӯроварӣ 470-сомонӣ, 2-адад телефонҳои мобилии тамғаи "Алкател" ва "Сони Эрексон"-ро тасарруф намуда, аз ҷойи ҳодиса ғайб задаанд", —иттилоъ дод ВУД.
Мақомоти умури дохилии Тоҷикистон мегӯянд, бо иттиҳоми даст доштан дар ин ҷиноят, марди 21-сола, сокини шаҳри Душанбе, ки пеш барои дуздӣ суд шудааст ва марди 22-сола, сокини пойтахт боздошт гардиданд.
Боздоштшудагон дар содир намудани ҷинояти роҳзанӣ муттаҳам мешаванд. Маъмурини милиса мегӯянд, амалиёт барои муайян ва дастгир намудани ду ҳаммаслаки дигари ҷинояткорон идома дорад.
