ДУШАНБЕ, 19 июн — Sputnik. Бино бар иттилои дафтари матбуоти Вазорати умури дохилаи Тоҷикистон, рӯзи 17-уми июни соли равон марди 30-солаи сокини ноҳияи Абдураҳмони Ҷомӣ бо марди 34-солаи сокини деҳаи Мирзоободи ҳамин ноҳия ҷангу ҷанҷол намуда, ӯро лату кӯб намудааст.
Сипас, маррди 30-сола аз хонаи истиқоматиаш корд гирифта, ду маротиба ба шикам ва пушти марди ҷабрдида задааст.
“Мувофиқи маълумотномаи тиббӣ ҷабрдида ҷароҳати вазнини ҷисмонӣ бардошта, дар беморхона бистарӣ гардидааст”, - таъкид намудааст манбаъ.
Дар ҳамин ҳол, кормандони милитсияи Тоҷикистон қайд намуданд, ки номбурда баъд аз ҳодисаи мазкур ихтиёран ба идораи милитсия дар ноҳияи А.Ҷомӣ ҳозир шуда, ба гуноҳи содирнамудааш пурра иқрор шудааст.
Дар ҳоли ҳозир кормандони милитсияи кишвар аз рӯи ҳодисаи мазкур тафтишотро идома доранд.
