ДУШАНБЕ, 13 янв – Sputnik. Кормандони милитсияи шаҳри Хуҷанд ду қиморбози ашаддӣ - Абдуаҳадов Рустам, истиқоматкунандаи чамоати деҳоти Нофароҷи шаҳри Истаравшан ва Саъдии Муҳиддин, истиқоматкунандаи маҳаллаи 13-уми шаҳри Хуҷандро, ки дар ҳудуди бозори "Панҷшанбе" қиморбозии кӯчагиро ташкил намуданд, боздошт карданд.
Дар ин бора дафтари матбуоти Вазорати умури дохилаи Тоҷикистон иттилоъ додааст.
Ба иттилои манбаъ, қиморбозии кӯчагӣ, ки дар байни мардум бо номҳои "алик-малик" ва "қарасан-топасан" маъмул аст, ҳарчанд мардумфиребии рӯирост бошад ҳам, мутассифона баъзеҳо онро манбаи даромад меҳисобанд.
Боздошти сокини 68 солаи Восеъ: манзили зисташро ба қиморхона табдил дод
Гуфта шудааст, ки бо тартиб додани парвандаи ҳуқуқвайронкунии маъмурӣ дар асоси моддаи 479 Кодекси ҳуқуқвайронкунии маъмурӣ аз тарафи нозирони минтақавии милитсия, суди шаҳри Хуҷанд нисбати хукуквайронкунандагон ҷазои ҳабс татбиқ намуд.
"Саъдии Муҳиддин ба муҳлати 10 шабонарӯз, Рустам Абдуаҳадов 7 шабонарӯз ҳабси маъмурӣ ҷазо гирифтанд”, - таъкид доштааст манбаъ.
Тибқи меъёрҳои қонунгузорӣ, ҷарима дар асоси моддаи 465 ва ҷазои ҳабсӣ дар асоси моддаи 475 Кодекси ҳуқуқвайронкунии маъмурӣ аз таъсиррасониҳои ҳуқуқие мебошанд, ки нисбати ташкилкунандагони бозиҳои кӯчагии "алик-малик" татбиқ мешавад.
