Врачи - Sputnik Тоҷикистон
Коронавирус дар Русия ва ҷаҳон: охирин хабару гузоришҳо
Созмони ҷаҳонии беҳдошт моҳи марти соли 2020 пандемияи коронавирус эълон кард

Дар ҷустуҷӯи беморхона то охирин нафас: фавти модари 4 фарзанд дар Маскав

© Sputnik / Томас ТхайцукМедицинская каталка в больнице, архивное фото
Медицинская каталка в больнице, архивное фото - Sputnik Тоҷикистон
Обуна шудан
Пас аз ташхисҳои барзиёд, танҳо лаҳзае, ки нафаскашии Гулшан танг шуд ӯро бо ёрии таъҷилӣ ба бемористон бурданд, фарзанди 7-моҳаашро тариқи ҷарроҳӣ аз батнаш гирифтанд ва пас аз 11 рӯзи нафаскашии сунъӣ ӯ вафот кард

ДУШАНБЕ, 7 май – Sputnik, Нилуфар Некқадам. Хонаводаи Нурматовҳо ба хотири дарёфти шифо ба Русия омада буданд, вале Маскав барояшон хонаи ғам шуд. Чигуна хонаводаи тоҷики муқими Маскав мотамзада шуд ва чигуна одамон метавонанд дар кишвари бегона барои ҳамдигар чун модар меҳрубон шаванд.

Рӯзи 4 май, модари чор фарзанд Нурматова Гулшан Расулқуловнаи 35-сола дар Химкии Маскав фавтид. Бино ба гуфти наздикони марҳум сабаби марги ӯ бемории гурда будааст. Ҷасади ӯро рӯзи 5 май ҳамватанон дафн карданд. Дар ин бора Хуршеда Ҳамроқулова, роҳбари Маркази фарҳанги тоҷикон дар саҳифаи фейсбукиаш хабар дода буд.

Аз ин зан чор фарзанд: духтари калонӣ, нобино - Севара (13 сола), Шерзод (12 сола), Иброҳим (8 сола) ва кӯдаки навзод Муҳаммад Салоҳ, ки 21 апрели соли ҷорӣ таваллуд шудааст, ятим монданд

В Москве открыт третий коронавирусный центр сети РЖД-Медицина - Sputnik Тоҷикистон
Натарсед! ифшогариҳои зодаи Тоҷикистон, ки дар Русия бар коронавирус пирӯз шуд

Падари фарзандон Нурматов Дилшод Худойбердиевич дар Тоҷикистон буда ба сабаби баста будани роҳҳо омадан наметавонад. Ӯ ронанда аст ва ба мусофиркашонӣ машғул мебошад. Дилшод ҳамроҳи бародари марҳум авоили моҳи март ба Тоҷикистон мусофиронро бурда ва он ҷо мондааст.

Феълан парастории ин кӯдакони ятимро ҳамсоя ва зани меҳрубон, модари панҷ фарзанд - муаллимаи забони арабӣ дар яке аз мадрасаҳои Маскав - Дилноза Холматоваи 43-сола бар ӯҳда дорад.

Даъвати Ҳамроқулова барои кумак ба 4 ятим: модар дар Русия фавтиду падар дар Ватан монд

Sputnik Тоҷикистон бо Холматова суҳбат кард ва ҷузъиёти фоҷиаи хонаводаи Нурматовро пурсон шуд.

"Гулшан дар ин шаҳр танҳо бародаре дорад, ки аз сабаби набуди ҳуҷҷатҳо дар ҷое кор мекунаду ба ҳеҷ куҷо намеравад. Ӯ танҳо зимни дафни апааш омада буд. Мо бо ӯ ҳамсоя ҳастем. Ҳамин се сол мешавад, ки рӯзеро ҳам бе суҳбати якдигар намегузаронем. Вақте, соли гузашта марҳум модарашро аз даст дод, ба ман гуфт ту дар ин шаҳри бегона бароям чун модар ҳастӣ. Дар ҳамаи корҳо бо ман маслиҳат мекард. Агар чизе болаззат омода кунад албатта ба ман мефиристод. Ӯро хеле дӯст доштам“, - нақл кард Дилноза, бо ашки чашмон. 

Аз як беморхона ба дигар то нафаси охирин

Ба гуфти Дилноза, ҳарорати Гулшан рӯзҳои 14-15 апрел баланд шуд. Рӯзҳои аввал ӯ фикр кардааст, ки гузаранда аст, вале бо такрор шудани вазъ ба Дилноза занг зада ёрӣ хостааст. Ёрии таъҷилӣ зани ҳомиларо наздики ҳашт соат дар шаҳр гардонидааст, вале ҷое ӯро қабул накардаанд.

"Моро бо мошини ёрии таъҷилӣ наздики ҳашт соат дар шаҳр гардонданд. Дар ягон беморхона моро қабул накарданд, гуфтанд ҷой нест ва ҳам аз шаҳрвандии бемор пурсон мешуданд. Моро ба се беморхона бурданд, вале бенатиҷа. Аз 20:00 то 03:00 мо бо зани ҳомила савори ёрии таъҷилӣ будем. Ва танҳо ними шаб ночор ба хона бозгаштем".

Рӯзи дигар ҳарорати Гулшан боз баланд мешавад. Ӯ ёрии таъҷилӣ занг мезанад ва пизишкон омада ӯро сӯзандору мегузаронанд ва ҳарораташро муътадил мекунанд. Вале саломатии марҳум бад шудан мегирад.

"Онҳо фармуданд, ки шушҳояшро фавран аз ташхиси компютерӣ гузаронем. Мо поликлиникаҳои хусусиро гаштем вале ҷое наёфтем, ҳамаҷо маҳкам буд. Пас дигар ташхисҳо, аз қабили ташхиси хун, гурда  гузаронидем, ки ҳамааш хуб буд. Рӯзи дигар боз занг заду гуфт нафаскашияш беҳад вазнин аст ва ӯ худро бад эҳсос мекунад. Ёрии таъҷилӣ омада ӯро зери асбоби нафасдиҳӣ ба 110 километр шимолтар аз Маскав, ба Талдом вилояти Маскав бурд. Он ҷо ӯро қабул накарданд, пасон ба Сергей - Посад фиристодаанд. Он ҷо ӯро қабул карданд, ки аллакай аҳволаш хеле вазнин буд", - нақл кард Дилноза.

Специалист Министерства обороны РФ в полевой биолаборатории, развернутой на авиабазе Орио-аль-Серио в Италии - Sputnik Тоҷикистон
Гирифтории як хонаводаи тоҷик дар ИМА ба COVID - 19 ва маслиҳат ба мардуми Тоҷикистон

Чун аҳволи марҳум бад будааст, пизишкон ӯро барои гузаронидани ҷарроҳӣ ба бемористони дигаре дар Одинсово равон кардаанд. Он ҷо фарзанди 7-моҳаи марҳумро аз батни модар ҷудо кардаанд ва кӯдакро ба беморхонаи ноҳияи Сергей- Посади вилояти Маскав дар суроғаи деҳаи Скоропусковский, 97 бозгардонидаанд. Худи Гулшан дар бемористон 11 рӯзи дигар таҳти асбоби нафасдиҳии сунъӣ будааст ва рӯзи 4 май вафот кардааст.

Дилноза мегӯяд, кӯдак бояд моҳи июн таваллуд мешуд, соли гузашта 12 июн, Гулшан як писарашро аз даст дода будааст, ӯ аз тиреза сарозер шуда ба ҳалокат расидааст.

Муҳаммад Салоҳ 1,9 кило таваллуд шудааст ва то имрӯз аллакай вазн гирифта 2,5 кило мебошад. 

"Аҳволаш хуб аст, насиб бошад пас аз 15 рӯз бояд ӯро ҷавоб диҳанд", - гуфт Дилноза аз қавли пизишкон.

Муҳоҷират ба хотири шифо 

Хонаводаи Нурматовҳо соли 2009 ба хотири дарёфти шифо - ҷарроҳии чашмони Севараи 13-сола, ки аз модар нобино таваллуд шудааст, ба Русия омада буданд. Падар дар бахши мусофиркашонӣ кор мекунаду марҳум ба тарбияи фарзандонаш машғул будааст. 

"Онҳо зиндагии хуб доштанд. Дилшод ва Гулшан ҳамдигарро дӯст медоштанд, ҳурмат мекарданд. Ин ҷо хонаи шахсӣ доранд. Аслан барои ҷарроҳии чашмони духтарашон омаданд", - гуфт Дилноза аз қавли Гулшан.

Вале то ҳол Севараи 13-сола барои ҷарроҳӣ омода нест, барои ин ҳам маблағ лозим аст ва ҳам бояд синну сол ва вазни духтар мувофиқ шавад.

"Ман тасми дорам ҳамаи он пулҳое, ки имрӯзҳо ҳамватанон ва шахсони хайрхоҳ барои кӯдакони марҳум мефиристанд барои ҷарроҳии Севара ҳазина шавад. Ният дорам, Дилшод кӣ омад албатта дар ин бора бо ӯ сухан хоҳам кард", - гуфт Дилноза.

Очереди мигрантов в УФМС - Sputnik Тоҷикистон
Сироятшавии 66 муҳоҷири тоҷик ба COVID - 19 дар Маскав: омори Созмони "Нур"

Дунё бе одамони хайрхоҳ нест

Дилноза Каримоваи 43-сола ки алъон парастории фарзандони марҳумро бар ӯҳда дорад, мегӯяд аз лаҳзаи аввал, ки хабари фоҷиабори ин хонавода расонаӣ шуд, ҳамагӣ ба ӯ занг мезананд, изҳори ҳамдардӣ мекунанд ва кумак мерасонанд.

"Медонед, дар чунин вазъияти сахт, ёфт мешаванд, нафароне, ки хайрхоҳ ҳастанд, меҳрубонанд. Ба ман як зан занг зада гуфт маблағи охирине, ки дар картааш буд, фиритсод ва хеле гирист. Ман барои ҳар яки онҳо изҳори сипос мекунам", - гуфт Дилноза.

Айни ҳол фарзандони Гулшан дар манзилашон ба сар мебаранд. Севара, ки нобино аст намехоҳад ба дигар хона равад, чун бо ҷою макони худ ошно аст ва метавонад дар хонааш озодона рафтор кунад. Дилноза, ки дар ҳамосягии онҳо ба сар мебарад, мегӯяд барои нигоҳубини онҳо зани тоҷикеро ба сифати момодоя кироя кардаанд ва худ зуд-зуд аз аҳволашон бохабар мешавад.

Дилноза шаҳрванди Қирғизистон аст ва падари хонадон эътимодномаро барои парастории се фарзандаш ба номи Янгилдина Танзила (ба хотири доштани шаҳрвандӣ - шарҳ аз идора) фиристодааст.

Парастори хонавода Дилноза мегӯяд, ба Севараи нобино ва се бародараш бетардид модар лозим аст. Кӯдакон то ҳол аз фоҷиаи рухдода хабар надоранд ва дар интизори модарашон ҳастанд.

Лентаи хабарҳо
0