ДУШАНБЕ, 4 сен — Sputnik. Александр Крестинин, сармураббии тими миллии Қирғизистон ва ҳамтои тоҷикистонияш Усмон Тошев дар Душанбе як рӯз қабл аз бозии марҳилаи интихобии Чемпионати ҷаҳон-2022 миёни дастаҳои ду кишвар нишасти матбуотӣ баргузор карданд. Ин сабқат 5 сентябр дар назар аст.
Нахуст сармураббии рустабори дастаи мунтахаби Қирғизистон Александр Крестинин ба ҷониби Тоҷикистон барои истиқболи гарму самимӣ ташаккур гуфт.
"Тавре ба ҳамагон маълум аст, фардо бозиҳои нахустини марҳилаи гурӯҳии даври дуюми интихобии Чемпионати ҷаҳон-2022 оғоз мешаванд. Ҳар дастае, ки иштирокчии гурӯҳи “F” аст, мехоҳад нахустин рақобаташро бо пирӯзӣ оғоз кунад. Инро танҳо вақт нишон медиҳад ва 5 сентябр, соати 19:00 мебинем, ки дар майдон кӣ пирӯз мешавад", - иттилоъ додааст “Ховар” аз қавли Крестинин.
Сармураббии дастаи мизбон Усмон Тошев изҳор дошт, ки ҳар дастае, ки ба майдон мебарояд, бояд бо худ мақсади муайян дошта бошад.
Ӯ хабар дод, ки тимаш тамринҳоро хуб оғоз кард ва бегоҳи 4 сентябр охирин машқи худро пеш аз бозӣ баргузор мекунад.
“Дар мавриди ҳайати асосӣ ҳоло ман чизе гуфта наметавонам. Ҳайати асосӣ танҳо як соат пеш аз бозӣ маълум мешавад. Мо танҳо барои пирӯзӣ мубориза мебарем. Зимни тамринҳо мо мушоҳида намудем, ки рӯҳияи бачаҳо болида аст ва дар байни онҳо ягон нофаҳмӣ нест. Бачаҳои мо пурра ба бозӣ бо дастаи мунтахаби Қирғизистон омода ҳастанд”, - иттилоъ дод “Ховар” аз қавли Тошев.
Сармураббӣ аз кулли мухлисони тоҷик, ки онҳо дар майдон футболбози 12-ум ба шумор мераванд, даъват ба амал овард, ки фардо ба Варзишгоҳи марказӣ омада, бачаҳоро дастгирӣ кунанд.
