Давлатов дар бораи пизишки зиндонӣ: Холдоровро бояд маҳкум кард, на ҷарроҳи миллатро

© Sputnik / Руслан Кривобок / Гузариш ба медиабонкАбдулло Давлатов, архивное фото
Абдулло Давлатов, архивное фото - Sputnik Тоҷикистон
Обуна шудан
Дуктур Абдулло Давлатов дар вокуниш ба боздошти Абдумалик Саломов, коршиноси маъруфи ҷарроҳии қалб дар Хуҷанд мегӯяд, як тавҳинкунанда ба миллат чун Шокир Холдоров бояд боздошту зиндонӣ шавад, на пизишке, ки садҳо касро аз марг наҷот додааст

ДУШАНБЕ, 27 окт — Sputnik, Фарида Бобоҷонова. Дуктур Абдулло Давлатов дар вокуниш ба боздошти Абдумалик Саломов дар паёме, ки дар саҳфааш дар "Фейсбук" мунташир кардааст, мегӯяд, ки ӯро хуб мешиносад ва ҳаргиз бовар намекунад, ки пизишки чирадасте чун ӯ бо салафиҳо иртибот дошта бошад.

Ёдоварӣ мекунем, ки Абдумалик Саломов як моҳ пеш аз ин дар Хуҷанд ба иттиҳоми иртибот бо салафиҳо боздошт шуда буд. Гуфта шуда, ки вай ҳамвора дар "маҳфили палав", ки салафиҳо баргузор мекардаанд, ширкат мекардааст.

Абдулло Давлатов мегӯяд Абдумалик Саломовро хуб мешиносад ва дар ҷаласаи дифоъ аз рисолаи номзади улумаш дар Маскав ширкат кардаву ӯро пизишке "вориси Сино" шинохтааст.

"Вақте, ки вай аз рисолаи номзадиаш бисёр хуб дифоъ кард, академику профессорҳои рус болотарин баҳоро барояш сазовор донистанд ва пешниҳодаш доданд, ки дар Русия монаду ба кору пажӯҳиш машғул шавад. Аммо Саломов мегуфт, Тоҷикистон бар мегардам ва ба Ватанам хидмат мекунам", — ба ёд меорад Абдулло Давлатов.

Ба гуфтаи ӯ, дуктур Абдумалик Саломов пас аз ҳимоя чанд сол дар Маскав кор кардаву сипас ба Тоҷикистон бар гаштааст.

Давлатов мегӯяд, "вақте ки гуфт Тоҷикистон меравам, ҳушдораш додам, ки дар Тоҷикистон эҳтиёт кунад то гирифтори макру дасисаи ҳасудон нашавад ва ҳамин тавр ҳам шуд".

© Фото : Аккаунт одноклассники / Абдумалик СаломовПизишк Абдумалик Саломов, акс аз бойгонӣ
Доктор Абдумалик Саломов, архивеное фото - Sputnik Тоҷикистон
Пизишк Абдумалик Саломов, акс аз бойгонӣ

Вай мегӯяд, Абдумалик Саломовро хуб мешиносад ва замоне, ки дар Русия иқомат дошт, рафту омаду гапу гуфт доштанд, аммо ҳаргиз дар миёнашон дар мавзуъҳои диниву мазҳабӣ баҳсе сар назадааст.

"Мо дар мавзуъҳои ҳирфаии пизишкӣ соатҳо гуфтугӯ мекардем. Лекин ҳаргиз гуфтугӯямон ба баҳси динӣ накашидааст. Ман бар ин боварам, ки ҳар касе, ки чун Абдумалик воқеан коршиноси хуб бошад, медонад, ки ҳар соҳае мутахассиси худро дорад ва соҳаи дин бисёр нозук аст", — меафзояд Давлатов.

Ӯ мегӯяд, ки ба кадом далел мамнуъ будани бархе аз равияҳои ислом дар Тоҷикистонро дарк карда наметавонад. Ба фикри вай, ҳар равия бояд озод бошад ва танҳо ҷинояткорон бояд ба ҷавобгарӣ кашида шаванд.

"Бояд ин нуктаро ёдоварӣ кунам, ки ҳеҷ намефаҳмам, чаро салафия, ваҳҳобия ё дигар равияву шохаҳои ислом, ки бо мазҳаби ҳанафӣ тафовут доранд, бояд ҳатман маҳкум шаванд. Чаро дар дигар кишварҳо ҳамҷинсгароёну масеҳиёну атеистҳову буддоиҳо — ҳама иҷозат дорад, ки ҳизбу ҳаракати худро ташкил кунад, аммо дар Тоҷикистон надоранд? Ман инро намефаҳмам. Шояд ин масъаларо наомӯхта бошам ва даркаш накунам", — нигаронӣ мекунад вай.

Давлатов бар ин назар аст, ки набояд касеро ба далели пайрави равияе будан маҳкум кард ва бояд пеш аз ҳама қонуни кишварро риоя намуд. Вай муътақид аст, ки касоне чун Шокир Холдоров бояд муҷозот шаванд, ки миллатро таҳқир кардааст, на Абдумалик Саломов, ки пизишки қалбҳост.

"Агар ман мебудам, ҳама равияҳоро иҷоза медодам, ки фаъолият кунанд вале қонуни давлатро ҳурмату риоя кунанд. Ҳар касе, ки қонуни давлатро  риоя намекунад, ӯро бояд маҳкум кард. Ба монанди ҳайвоне, ки дар масҷид ҳақорат кард, ӯро бояд бигиранду зиндон баранду ба маҳкама кашанд, на ҷарроҳеро, ки даҳҳо ҳамватани моро  дар Тоҷикистон аз марг наҷот додааст", — гуфт Давлатов.

Шприц, архивное фото - Sputnik Тоҷикистон
Вақте пизишк “одамкуш” мешавад...

Дуктур Абдулло Давлатов Абдумалик Саломовро инсони нармхӯву хушгап мехонад ва мегӯяд ҳеч нишоне аз ифротгароиро дар рафтору гуфтораш надидааст.

Вай боздошти ин пизишкро падидае нигаронкунанда ва гувоҳ бар вуҷуди бухлу ҳасад дар сохторҳои кишварӣ медонад, ки коршиносони ҳирфаиро ба коми худ мекашад.

Абдумалик Саломов 41 сол дорад ва Донишгоҳи тиббии Тоҷикистонро хатм кардааст. Вай аз соли 2015 дар Маркази ҷарроҳии қалбу раг дар вилояти Суғд кор мекард.

Фаъолияти ҷараёни "Салафия" дар Тоҷикистон ба ҳукми Додгоҳи олии ҶТ дар соли 2009 мамнуъ шуда буд. Соли 2014 ин ҷараён расман ифротгаро эълон шуд.

Лентаи хабарҳо
0