ДУШАНБЕ, 8 апр — Sputnik. Сарпарасти шаҳрдории Душанбе Рустам Эмомалӣ бо фармони раисҷумҳур Эмомалӣ Раҳмон расман шаҳрдори пойтахти Тоҷикистон таъйин шуд.
Вебгоҳи расмии шаҳрдорӣ Қарори раиси шаҳри Душанберо мунташир карда, ки дар он аз фармони раиси Ҷумҳурии Тоҷикистон аз 4 апрели соли 2017, №862 «Дар бораи Раиси шаҳри Душанбе таъин намудани Рустами Эмомалӣ» ёд мешавад.
Бино бар ин Қарор, Маҷлиси вакилони халқи Душанбе дар нишасте, ки 18 апрел баргузор хоҳад шуд, ин фармони нав дар бораи мақоми Рустам Эмомалӣ ва ҳамчунин ваколаташ дар маҷлиси пойтахтро тасвибу таъйид хоҳад кард.
Ёдоварӣ мекунем, ки Рустам Эмомалӣ дар интихоботи миёндаврии Маҷлиси вакилони пойтахт, ки 2 апрел баргузор шуда буд, дар ҳавзаи интихоботии шумораи 25 баранда шуд.
Бино ба гузориши раиси Кумисюни интихоботии шаҳри Душанбе, Рустам Эмомалӣ дар ин ҳавза 84,80 дарсад раъй ба даст овард. Рақибони ӯ аз ҳизбҳои демократӣ ва аграрӣ — Ҳикматулло Саидиён ва Фазлиддин Икромов — мутаносибан 2,63 ва 7,81 дарсад раъй гирифтанд.
