ДУШАНБЕ, 28 сен — Sputnik. Фурӯшандаи бодиринг аз Қирғизистон дар фестивали маҳсулоти кишоварзии Қазоқистон ситораи ҷашнвора гардид.
Ярмарка-намоиши Koktobe Bazart рӯзҳои истироҳати гузашта дар шаҳри Алмаатои Қазоқистон баргузор шуд, хабар медиҳад Sputnik Қирғизистон.
Дар ду рӯзи ярмарка-намоиш, маҳсулоти полезии Тилек Токтогазиев, ки то ин дам ба парвариши сабзавот дар гармхона машғул буд, таваҷҷӯҳи харидорони зиёдро ба худ ҷалб кард.
Дар саҳифаи Facebook-и худ ӯ навиштааст, ки бодирингҳоро таҳти мусиқии Бетховен парвариш мекунад. Баъди ин дар тамоми саҳифаҳои иҷтимоӣ аксҳои бодирингҳои "Бетховен" пайдо шуданд.
"Ин на танҳо роҳи маркетологӣ, балки барои таркиби бодирингҳо низ фоидабахш аст, ки кайҳо боз аз тарафи олимон исбот шудааст. Ба фикрам дар ҳамин намоиш ҳама бо бодирингҳои мо акс гирифтанд. Мо шодем, ки ба воситаи маҳсулоти бо ишқ парвардашуда, ба мардум хушнудӣ мебахшем",-гуфт Токтогазиев.
Як килограмм бодиринг дар ин намоиш бо нархи 30 сом (3,5 сомонӣ) ба фурӯш монда шуда буд.
