ДУШАНБЕ, 30 июл — Sputnik. Бар хабари Раёсати мубориза бар зидди ҷиноятҳои муташаккили ВУД Тоҷикистон , соли равон кормандони ин ниҳод 10 ҳолати ҷинояти марбут ба савдои одамонро ба қайд гирифтанд.
Бояд қайд намуд, ки савдои одамон дар ҷаҳони муосир яке аз масъалаҳои доғи рӯз маҳсуб ёфта, ҳамарӯза дар дунё, бахусус дар кишварҳои ҷангзада ва суботашон ноустувор ҳазорҳо нафар одамони бегуноҳ, хусусан занону кӯдакон дучори ин ҷинояти вазнин ва амалу кирдори ҷинояткоронаи савдогарони одамон мегарданд.
Дар асоси омори Созмони ҷаҳонии муҳоҷират, ҳамасола дар ҷаҳон ҳудуди 4 миллион нафар одамон қурбонии ҷинояти савдои одамон мегарданд, ки ин вазъ ҷомеаи ҷаҳонро ба ташвиш овардааст.
Зимнан дар назди Раёсати мубориза бо ҷиноятҳои муташаккили Вазорати корҳои дохилии Ҷумҳурии Тоҷикистон бо мақсади тақвияти пешгирӣ ва мубориза бо савдои одамон Маркази муқовимат ба савдои одамон таъсис дода шудааст.
Кӣ киро мефурӯшад? Генерал дар бораи савдои одамон дар Тоҷикистон
Ёдовар мешавем, ки қаблан генерал Икром Умарзода, муовини вазири умури дохилии Тоҷикистон зимни ҷасалаи парлумонӣ дар Душанбе изҳор намуда буд, ки 90 дарсади дастандаркорони савдои одамон, ки тайи даҳ моҳи соли равон боздошт шудаанд, занон мебошанд.
Ба гуфтаи Умарзода, дар даҳ моҳи соли ҷорӣ дар доираи парвандаҳои ҷиноятии марбут ба савдои одамон 49 нафар дастгир шуданд, ки аз ин 5 нафар мард ва 44 нафар зан мебошанд.
