ДУШАНБЕ, 11 ноя — Sputnik. Корхонаи воҳиди давлатии "Истеҳсол, харид, захира ва фурӯши маҳсулоти ниёзи аввалия"-и шаҳри Душанбе аз ширкатҳои Беларус — "Комбинати гӯшти Слонимск" ва "Комбинати гӯшти Слутск" ба ҷумҳурӣ 300 тонна гӯшти чорвои калон ворид менамояд.
Ин иқдом бо супориши раиси шаҳри Душанбе Рустами Эмомалӣ, баҳри таъмини бозорҳои истеъмолии шаҳр бо гӯшти баландсифату арзон ва муътадил нигоҳ доштани нархи он амалӣ мешавад. Айни замон ба пойтахт 20 тонна гӯшти гов оварда шуда, минбаъд низ марҳила ба марҳила воридоти он меафзояд.
Бино ба гузориши АМИТ "Ховар", КВД "Истеҳсол, харид, захира ва фурӯши маҳсулоти ниёзи аввалия"-и шаҳри Душанбе бо ширкатҳои Ҷумҳурии Беларус — ҶСК "Комбинати гӯшти Слонимск" ба маблағи як миллион доллари ИМА ва ҶСК "Комбинати гӯшти Слутск" панҷсад ҳазор доллари ИМА ҷиҳати хариди гӯшти гов шартномаҳои ҳамкорӣ ба имзо расонидааст.
Бо дастгирии бевоситаи раиси шаҳри Душанбе мутахассисон — кормандони соҳа барои забҳи чорво ба ин давлатҳо сафарбар карда шудаанд. Бо мақсади дар ҳолати хуб нигоҳ доштани маҳсулоти воридшуда дар маҳаллаи 33-и ноҳияи Синои пойтахт мағозаи фурӯши гӯшт ба фаъолият шурӯъ намуд, ки ҷавобгӯ ба талаботи замони муосир аст.
"Дар пойтахти мамлакат аз ҷониби масъулин барои нигоҳдории гӯшти аз хориҷи мамлакат воридшаванда ва интиқоли он шароити зарурӣ фароҳам оварда шудааст. Маҳсулоти гӯштӣ дар яхдонҳо нигоҳ дошта шуда, онҳо бо мошинҳои махсусгардонидашуда ба суроғаи даркорӣ интиқол меёбанд", — афзуд манбаъ.
Дар ин маврид сардори Раёсати бехатарии озуқавории шаҳри Душанбе ва шаҳру ноҳияҳои тобеи ҷумҳурӣ Бобошо Кармишев иброз дошт, ки "воридоти маҳсулот танҳо ба он ширкатҳое иҷозат дода мешавад, ки дорои сертификати "Ҳалол" буда, тибқи талаботи Созмони умумиҷаҳонии савдо амал менамоянд. Барои омӯзиши вазъи эпизоотикии ин кишварҳо аз ҷониби Кумитаи бехатарии озуқаворӣ мутахассисон ва коршиносони давлатӣ ба он ҷумҳуриҳо фиристода мешаванд".
Ёдовар мешавем, ки Ҳукумати Ҷумҳурии Тоҷикистон қарор ба тасвиб расонид, ки тибқи он аз 1 августи соли равон воридоти чорво ва хӯроки чорво аз пардохти андоз аз арзиши иловашуда ва боҷи гумрукӣ озод гардид.
Ҳадафи ин қарор ба эътидол овардани нархи гӯшт дар бозор ва қонеъ гардонидани талаботи бозори истеъмолӣ бо ин намуди маҳсулот мебошад.
Дар назар дошта шудааст, ки ҳамзамон паҳншавии бемориҳои хатарноки ҳайвонот тавассути чорвои воридшаванда ва воридшавии гӯшту маҳсулоти гӯштии пастсифат ба ҷумҳурӣ қатъиян пешгирӣ карда мешавад.
Тибқи қарори мазкур, мақомоти дахлдор бояд барои қонеъ гардонидани талаботи бозори истеъмолии дохилӣ бо гӯшт бо сохторҳои дахлдори ҷумҳуриҳои Беларус, Қазоқистон ва Қирғизистон бештар ҳамкорӣ намоянд.
Тавре муовини вазири кишоварзии Ҷумҳурии Тоҷикистон Нусратулло Мусозода иброз дошт, "тибқи ин қарор воридоти чорво ва маҳсулоти хӯроки чорво (комбикорм) аз пардохти андоз аз арзиши иловашуда ва боҷи гумрукӣ озод карда шудааст. Аз ин рӯ Вазорати кишоварзии ҷумҳурӣ вобаста ба ин масъала тадбирҳои зарурӣ амалӣ намуда истодааст".
Муовини вазир ҳамчунин иброз дошт, ки баъди ба тасвиб расидани ин қарор аз ҳудуди ҷумҳурӣ берун баровардани чорвои зинда тавассути сарҳади давлатӣ ва гузаргоҳҳои гумрукӣ пешгирӣ гардида, дар сурати рух додани ин ҳолат тадбирҳои қатъӣ андешида мешаванд.
Дар ҷумҳурӣ вобаста ба ҳолатҳои ғайриқонунии нигоҳ доштани чорво ва забҳи он дар дӯконҳои гӯштфурӯшӣ гурӯҳи корӣ таъсис дода шудааст. Фаъолияти гурӯҳи мазкур дар доираи қонунгузории амалкунанда ба бартараф кардани камбудиҳои ошкоргардида ва ба тартиб даровардани масъалаи зикршуда равона гардидааст.
Тибқи қарори мазкур, мақомоти дахлдор вазифадор карда шудаанд, ки дар маҳаллаҳои сераҳолии шаҳри Душанбе растаю дӯконҳои гӯштфурӯшии ҷавобгӯй ба меъёрҳои муқарраршуда ва талаботи санитарию гигиенӣ таъсис дода, инчунин дар мағозаҳо фурӯши гӯшт ба таври васеъ ба роҳ монда шавад.
Бино ба маълумоти Вазорати кишоварзӣ, дар ҷумҳурӣ соли равон истеҳсоли гӯшт 73 ҳазору 996 тоннаро ташкил додааст.
