ДУШАНБЕ, 26 дек — Sputnik. Бо ибтикори соҳибкорони тоҷик дар шаҳри Воронеж чойхонаи "Роҳат" ифтитоҳ ёфт, хабар медиҳад дарфтари матбуотии Намояндагии Вазорати меҳнати ҶТ дар Русия.
Бино бар иттилои манбаъ, соҳибкорон Ҳомидҷон Фазлиев ва Ҷамолиддин Хоҷаев чанд сол аст, ки дар Русия кору зиндагӣ мекунанд. Нақшаи кушодани чойхонаи миллиеро, ки дӯстдорони ошхонаи шарқӣ, хусусан тоҷикӣ тавонанд аз он баҳрабар шаванд, соҳибкорон чанд сол боз мекашиданд.
Чойхонаро ба муносибати чойхонаи машҳури пойтахт — "Роҳат" ном карда, ошпазонро махсус аз Тоҷикистон даъват кардаанд.
Ба гуфтаи соҳибкорон, онҳо ошпазони моҳирро даъват кардаанд.
"Ошпазон барои мизоҷон палов, самбусаву манту, ва лағману мастоваро ба тарзи махсус омода карда медиҳанд. Ҳамчунин "Роҳат" бо услуби шарқиёна сохта шуда, деворҳои он бо кандакориву сӯзанӣ ва либоси миллӣ оро дода шудааст",- гуфта мешавад дар иттилои манбаъ.
Манбаъ афзудааст, пас аз ифтитоҳи чойхонаи "Роҳат" зиёда аз 20 тан, ки бештарашон муҳоҷирони меҳнатӣ мебошанд, ба ҷойи кор таъмин шудаанд.
